الفرق بين رياضي عادي وبطل .. هو قوة العقل
حوار مع د. عبدالله أحمد – استشاري العلاقات الأسرية والزوجية والمتخصص في الدعم النفسي
متابعة نشوى شطا
دكتور عبدالله، كتير من الأهالي والمدربين بيقولوا: “اللاعب ده موهوب جدًا” أو “الولد ده جسمه قوي”، لكن في الملعب الأداء مختلف.. فيه واحد بيبان عادي والتاني بطل. إيه السبب الحقيقي؟
د. عبدالله يجيب: “السبب الأساسي هو قوة العقل. المهارة واللياقة مهمة، لكن اللي بيحدد مصير اللاعب تحت الضغط هو قوة عقله. البطل الحقيقي مش بس اللي يعرف يلعب كويس.. هو اللي يقدر يدير نفسه نفسيًا وعاطفيًا وقت المواقف الصعبة”.
دور أولياء الأمور
طيب والأهالي ليهم دور إزاي؟
“الأهالي ليهم دور محوري جدًا. الطفل الرياضي محتاج يسمع من والده ووالدته كلمات تشجيع مش بس على الفوز، لكن على مجهوده، التزامه، وروحه الرياضية.
لو كل التركيز من البيت على النتيجة بس، الطفل هيتعلم إنه قيمته مرتبطة بالفوز فقط، وساعتها أي خسارة هتكسّره.
أما لو البيت دعمه بالكلمة الطيبة، هيبني داخله عقلية مرنة تقدر تقوم بعد أي سقوط”.
دور المدربين
والمدرب يا دكتور؟
“المدرب مش دوره تدريب عضلات بس. لازم يهتم بعقلية اللاعب. إزاي؟
يعلّم لاعبيه إن الغلط فرصة للتعلم مش نهاية العالم.
يديهم تدريبات تركيز وتنفس تساعدهم يتعاملوا مع التوتر.
يحفّزهم على التفكير الإيجابي: (أنا أقدر – أنا مستعد – أنا هبذل أقصى جهدي).
كلمة واحدة من مدرب ممكن ترفع لاعب للسماء أو تكسره للأرض، وده يورينا قد إيه التدريب النفسي مهم زي البدني”.
اللاعب نفسه
طيب اللاعب نفسه يعمل إيه عشان يبقى بطل؟
“فيه 3 عادات بسيطة بس قوية جدًا:
1. التركيز اليومي: اللاعب لازم يتعلم يتحكم في أفكاره مش بس في التمرين، لكن كمان في حياته اليومية.
2. الحوار الداخلي: الكلام اللي اللاعب بيقوله لنفسه أقوى من كلام أي مدرب. لازم يختار إنه يكون إيجابي.
3. المرونة الذهنية: الخسارة مش نهاية، هي مجرد محطة للتعلم. البطل يشوفها فرصة يطوّر نفسه”.
الخلاصة
د. عبدالله أحمد: “الفرق بين لاعب عادي وبطل مش في القدم ولا في السلة ولا في أي لعبة.. الفرق في قوة العقل.
الأهل، المدرب، واللاعب نفسه شركاء في بناء القوة دي.
ولما العقل يتدرّب زي الجسم، اللاعب مش بس هيفوز بمباراة.. لكنه هيبقى بطل في حياته كلها”.
