كتبت ميرنا يونس
الفكره فيك انت يعني اي؟!
جمله غريبه وموضوع جديد وغريب بس دي الحقيقه !.
الحقيقه اللي مفيش حد بيفكر فيها اي انسان بيقع تحت ضغط نفسي او مشكله معينه سواء عائليه ، ماديه ، عاطفيه الي اخره …… مش كل الناس بتفكر بطريقه ايجابيه اثناء فتره المشكله بمعني ؟
في ناس كتير مثلا علي سبيل المثال بيكونوا اتنين اخوات وبيتعرضوا لنفس الضغط النفسي من اسرتهم مثلا ف شخص فيهم ممكن يفكر بطريقه ايجابيه يعني مثلا ينزل الچيم ، يمارس رياضه معينه ، يقرأ كتاب ، يتفرج علي فيلم معين بيحبه ، يشغل اغنيه معينه بيحبها ، ينزل يتمشي ، يتعلم حاجه جديده دي كلها اساليب ايجابيه وفكر ايجابي .
الشخص التاني ممكن يفكر انه يهرب من الواقع بطرق سلبيه زي انه يلجأ للادمان المخدرات او السكر او اي نوع بشكل سلبي ، يتحول من شخص ايجابي مثلا لشخص سلبي جدا .
السوال هنا ، هل الشخصيين دول المشكله في مين فيهم فالعائله ولا الظروف ولا البيئه المحيطه بيهم ؟!
الحقيقه هي ولا حاجه من دول كل دي اسباب ومبررات بنطلعها “شماعه بنعلق عليها اخطاءنا ” .
لكن الحقيقه هي المشكله في الشخص نفسه هل هو حابب يهرب من الواقع دا بنجاح وقوه وتحويل حياته من حياه فاضيه لحياه مليانه بالنجاح والظهور او انه يهرب لاي طريقه سلبيه .
انت ، انت اللي في ايدك تغير حياتك للاحسن وانت اللي في ايدك تغير حياتك للاسوء .
تفكير سلبي + طاقه سلبيه = نتيجه سلبيه .
تفكير ايجابي + طاقه ايجابيه = نتيجه ايجابيه .
القصه كلها فيك انت
كُن ايجابي ومتستناش طاقه ايجابيه من حد انت اديها لنفسك .
