متابعة نشوى شطا
التعبير عن الاحتياجات مهارة بيفتقدها ناس كتير وللأسف بتكون سبب في عدم فهم الطرفين لبعض وبالتالي بيكون فيه مشاكل وخلافات متراكمة كتير بدون أي حل.
وهنا يشير مستشار الدعم النفسي د.عبدالله أحمد لازم نكون فاهمين إن الخلافات دي جزء طبيعي جدًا في أي علاقة، ولكن المهم نكون عارفين إزاي نتواصل مع بعض بشكل سليم ونعبر عن احتياجاتنا.
ويضيف د.عبدالله أحمد هقولك ٤ طرق عشان تقدري تعبري عن احتياجاتك بشكل سليم:
1. اتخلصي من مشاعرك السلبية قبل ما تبدأي في أي حوار مع شريكك، لأنك لو حاولتي تعبري عن احتياجاتك وجواكي مشاعر من الزعل أو الغضب غالبًا هيكون صعب إنكم تفهموا بعض وتحلوا المشكلة.
2. اختاري الوقت المناسب عشان تتكلمي مع شريكك وممكن كمان تديله فكرة إنك محتاجة وقت تتكلمي معاه في موضوع مهم وبكده تكوني ضمنتي إن الوقت مناسب.
3. ابدأي الحوار ب “أنا” ومشاعرك بدل ما تقولي “أنت”. فمثلًا، ممكن تقولي جملة زي “أنا بحس بالأذى إنك دايمًا مهتم بشغلك” بدل ما تقولي “أنت دايمًا مهتم بشغلك”.
4. حاولي دايمًا تسمعي شريكك وهو بيتكلم وتفهمي مشاعره.
الطرق البسيطة دي بتغير شكل العلاقة مع الشريك وبتخلي التعبير عن الاحتياجات أسهل بكتير، وبالتالي علاقة ناجحة بين الأخد والعطاء.
ويؤكد استشاري العلاقات الاسرية والتربوية أغلب الناس عندهم مشكلة واضحة في التواصل وانهم يطلبوا احتياجاتهم من شركائهم في العلاقات المختلفة، وده لأننا بنكرر الطريقة اللي شوفنا أهالينا بيتواصلوا مع بعض بيها اللي أغلبها مفيهاش توضيح صريح للمشاعر أو الاحتياجات.
ويضيف لازم تبقى عارف إن شريك حياتك مش المفروض يقرأ دماغك، ولا أفكارك، ولا احتياجاتك، لازم أنت تكون عارف ايه هي احتياجاتك، وتعرف تطلبها بشكل واضح وصريح.
وينصح دكتور عبدالله أحمد لما تيجي تطلب حاجة من شريك حياتك، لازم تطلبها بأسلوب يخلي اللي قدامك يتقبل إنه يسمع منك، فمثلا:
– بدل ما تقول “مشاعري دايمًا مش فارقة معاك”، ممكن تقول “أوقات بكون محتاج أتكلم أكتر عن مشاعري، ونفسي تسمعني من غير ما تحكم عليا”.
– بدل ما تقول “عمرك ما بينتلي إنك مهتم بيا”، ممكن تقول “هكون مبسوطة أوي لو كتبتلي أو بعتلي رسالة كل فترة تبينلي إنك مهتم وبتفكر فيا”.
– بدل ما تقول “أنت دايمًا مشغول عني”، ممكن تقول “بقالي فترة حاسس إننا مش بنتواصل كتير، ممكن ناخد يوم اجازة نقضيه سوا؟”
ويختتم دكتور عبدالله أحمد مستشار الدعم النفسي كلامه أن الوضوح والصراحة في العلاقات هي أهم خطوة للتفاهم والاستمرار، وأحيانًا التعبير عن احتياجتنا بيكون صعب علينا ومش متعودين عليه، وبالتالي ده بيأثر على حياتنا سوا..
لو مش قادر تحدد احتياجاتك وتعبر عنها بصورة واضحة جرب تستعين بحد متخصص يساعدك تتواصل مع نفسك بصورة أحسن وتتعرف على احتياجاتك، فتقدر تتواصل مع غيرك وتعبر لهم عن احتياجاتك من العلاقة معاهم.
