حوار صحفي مع ثمرة الابداع والمثال الحسن “sollie”كما يلقبها احبابها سلمى جمال موهبة الصعيد.
كتب: محمد مصطفى
في بداية الحوار بنرحب بالاستاذة “سلمي جمال”رسامة الفن التشكيلي
ممكن نتعرف بيكي ..؟
انا اسمي سلمي جمال عمران من محافظة قنا تحديدا مركز نجع حمادي عندي 19 سنة في كلية التجارة جامعة جنوب الواد.
اي نوع الرسم ال بتقدميه..؟
الرسم التشكيلي .
كلميني عن موهبتك وبداية ظهورها..؟
انا من زمان جدا بحب الرسم من و انا طفلة بس طبعا مكنش رسمي محترف بس لاني بحب الرسم حبيت اني اطوره و اوصل المستويات للي انا عيزاها
مكنش حد بيعلمني فكنت بتعلم بنفسي عن طريق اني اتفرج ع ناس بترسم سواء صحابي للي رسمهم محترف او الميس بتاعت الرسم و اخد منهم افكار و اشوف بيرسمو ازاي و أحاول اقلدهم و ارسم كتير عشان اتحسن
و فعلا كنت بتحسن بس كنت لسه بردو موصلتش للمستوى للي عيزاه
فضلت احاول اقلد اي صور بشوفها سواء ف الكتب او حتي ع غلاف الكراسات و اجيب رسومات لكرتون و أحاول اقلدها
لحد مجت فترة حظر الكورونا و انا استغلت الفرصة دي عشان كان عندي وقت كبير فاضي مش بلاقي حاجة عملها فيه ف ابتديت اشوف فيديوز كتير ع اليوتيوب و شوف كورسات اونلاين و هكذا و رسمي اطور جدا في الفترة دي و خلي الناس تلفت ليا و اني بعرف ارسم كويس
و فضلت اتدرب كتير لحد م وصلت اني ارسم شخصية و كانت محمد صلاح و رسمتها و عجبتهم جدا
و بعدين جيت بعدها بسنتين فكرت اني انشر رسمي ع السوشيال ميديا و عملت كده و لقيت ردود الأفعال جميلة اوي و كانت بتحفزني اني اكمل و اتطور اكتر و اكتر و واحدة واحدة الناس بقت تزيد ع البيدج و كمان يطلبو مني اني ارسمهم بس مكنتش ببقي مستعة اني ارسم اشخاص كنت عايزة استني لحد متطور خالص
و مع الوقت و الرسم الكتير نزلي بوست ع جروب التربية الفنية بنجع حمادي بيتكلمو فيه عن موهبتي.
هل دعمك حد في بداية المشوار.؟
ف الاول محدش كان بيدعمني او يساعدني انا كنت بعمل كل حاجة بنفسي بس بعدين بقا عندي صاحبتي شهد بتدعمني و الرسامين للي عندي ع البيدج.
طب اي هي طبيعة الدعم من ال بيحبوكي.؟
انى نزلت ستوري باني هبدا اشتغل اوردرات و لقيت إقبال حلو اوي من الناس و كلو نفسه يترسم و نزلي مقال في جريدة اليوم السابع بيحكي عن موهبتي و جريدة الوطن و مجلة عالم النجوم و شاركت في مسابقة موهبتك للنور و تكرمت من قناة الصعيد و عملت لقاء مع قناة الصعيد
و اخدت شهادة تقدير من المنصة الباكيستانية
طب ممكن تعرفينا اي هو طبيعة الرسم التشكيلي.؟
الرسم التشكيلي هو بيعتمد ع البصر انك بتشوف حاجة و بتديك شعور معين و بتحاول تقلدها.
طب مين من الفنانين ال اتاثرتي بيهم وهل الرسم بالنسبالك هوايه ولا موهبة؟
هو انا مش بقرا بصراحة عن الفنانين المشاهير اوي
بس عندى فنانين ع البيدج اتاثرت بفنهم و نفسي ابقي زيهم زي حسين محمد و مصطفي كمال و كريم عادل و عبد الرحمن احمد و ناس كتير .الرسم بالنسبالي موهبة.
طب اي هو اللقب ال الناس بتحبك بيه ..؟
Solli واتمني افتح براند كبير واطبع الاسم عليه
طب اي محتوي اول رسمه رسمتيه ياسلمي..؟
كان بورتريه عادي لرسمة بنت و عملت لشعرها شكل معينة و كانت مبتسمة
طب ممكن اعرف اي ال بيلهمك للرسم..؟
اني اشوف صورة عجباني او ملامح حد عجباني فبحب اقلد للي شفته.
اعرف طموحك الفترة الجاية اي ..؟
اني اتطور اكتر من كده و اني اتعرف كمان اكتر من كده و ارجع اعمل اوردرات كتييير و ارسم ناس كتييير اوييييي لكل للي نفسهم يترسموو اني اكبر البيدج بتاعتي.و طموحي فيما بعد أن يكون ليا مكان خاص بيا و اطبع شنط عليها اللوجو بتاعي.وكمان بردو مستنين ان يكون ليا مكان خاص بيا ومعرض كبير.
كلمينا ازاي بتوفقي بين الرسم وبين دراستك.؟
مجال لتجارة بيعلمني اتعامل ازاي مع الناس للي بتبقي طالبة الاوردر و بيخليني اعرف اسوق منتجاتي ع السوشيال ميديا و ازاي اكون علاقات كويسة تساعدني فبحس اني بربط المجالين ببعض
اما ازاي بوفق من ناحية الوقت و كده
الرسم بالنسبالي بيبقي الحاجة للي بتخليني افصل عن جو المذاكرة لو زهقت و كده ف بيبقي البريك بتاعي بدل الخروج او السوشيال ميديا ف غالبا بيكون بليل بعد م اخلص مذاكرة و ده بيساعدني اني استغل وقتي ف حاجة بحبها و اكسر ملل اليوم
طب ووالدك ووالدتك اتعاملو مع موضوع الرسم ازاي..؟
هم في الأول كانو شايفين اني برسم عادي و بحب الرسم زيي زي اي حد بس لما شافو رسمي اتطور مرا واحدة و وصل للمستوى ده و بقيت ارسم اشخاص عرفو اني موهوبة و اني حابة المجال ده بجد و كانو بيعجبو برسمي.
في نهاية الحوار تقولي اي للناس ال بتدعمك والناس ال لسه بتبدا مشوارها زيك ..؟
اقول للناس للي بتدعمني
شكرا جدا و بجد كلامهم بياثر فيا جدا و بيساعدني اكمل و لو حسيت اني محبطة بفتكر كلامهم و برجع اكمل تاني و ابقي احسن من الاول و شكرا انهم بيبقوا عايزين يساعدوني باي طريقة عشان اوصل لحلمي.
اما الناس المبتدئة احب اقولهم ركزوا ع موهبتكم و متتخلوش عنها ابدا و ان دي حاجة جميلة و دايما حاولو طوروا من نفسكم و خدو كورسات و اتفرجو ع فيديوز كتير ع اليوتيوب و خلوا حد من الرسامين يتابع معاكم عشان يقولكم ع الأخطاء للي في الرسومات و متستسلموش لاي إحباط تواجهوه لان الناس للي بتقول رأيها السلبي بيبقوا في الأغلب مش فاهمين في الرسم اصلا.
