لمياء الكاتب
البداية كانت من عند شغلي، انا بشتغل في النقاشة من وقت ما خلصت تعليمي، مافيش حد شاف الفن اللي بيطلع من تحت ايدي، غير ومدح واتبهر باللي بعمله، والحمد لله.. ده كفاية عشان شغلي يتوسع في كل حتة، بالمناسبة انا اسكندراني واسمي “حسن”.. من كام سنة جتلي شغلانة في القاهرة، عرفت من صاحبي اللي جبهالي، إن مطلوب تشطيب شقة كبيرة في منطقة من المناطق الجديدة، هيكون معايا كام عامل يساعدوني في الشغل، بيشتغلوا مع مهندس ديكور اسمه”شريف”.. ماتأخرتش في الرد بالموافقة، بعد ما أكد عليا إن المصنعية اللي هطلبها هخدها، وفي مكان لإقامتي فترة وجودي بالقاهرة، واهو زي ما بيتقال “الرزق يحب الخفية”.. بعد ما وصلت للمكان اللي في الشغل، اتعرفت على العمال والمهندس والدنيا مشيت تمام.. بعد ما ارتحت من الطريق ساعتين زمن بدأنا شغل في الشقة، والحمد لله الامور كانت كويسة والتفاهم اللي بين العمال وبيني، خلت ايام الشغل تبقى خفيفة وتعبه ما نحسش بيه.. لحد قبل تسليم الشقة بأيام تتعد ع صوابع الأيد، اليوم ده اتأخرنا شوية في الشغل لقُرب نص الليل، يومها سهر معانا المهندس ومارضيش يمشي، حاولنا معاه كتير إنه يرجع بيته، بس رفض.. ساعتها واحد من العمال وقف الشغل وقال..
ـ بقولكم ايه يا رجالة.. مدام كده كده سهرتنا هطول، والباشمهندس معانا ومنورنا، ما تيجوا نرتاح نص ساعة ونعملنا دور شاي في الخمسينة، نفوق كده عشان نظبط الأداء.
رحب المهندس بفكرة العامل، شاور لباقي العمال يتجمعوا ويقعدوا، وهم صراحة ما صدقوا، فرصة كويسة يرتاحوا شوية من تعب اليوم، راح واحد منهم جاب وابور كنا بنعمل عليه الشاي، كل واحد مننا سحب شاله واتلف بيه من البرد، ما هو الوقت ده كنا في عز شهر طوبة، والمناطق الجديدة في الشتا جوها تلج، بس القعدة مع الكلام وكوباية الشاي، خلوا الواحد حرارة جسمه عليت ودفي، مانتبتهش لصوت الهوا اللي عمال يخبط في ازاز الشبابيك، ولا صوت المطر اللي كان محتاجة مقطع لأغنية فيروز، وقتها افتكرت جو اسكندرية تحت المطر، مافيش اجمل من كده.. فقاطعت ضحك العمال مع المهندس، بصيتله بعد ما شربت من كوباية الشاي، قولتله..
ـ صراحة يا هندسة، الشتا هنا في القاهرة صعب.. بعكس اسكندرية خالص، مع ان الجو بيبقى برد جدا، بس تتمنى تمشي على البحر وقت المطر، ماجربتش تعملها مرة وتيجي فسحة كام يوم في اسكندرية؟.. تغير جو مع عيلتك.
لف العمال وشهم ناحية المهندس، استنوا رده زيي واكتر، مسك كوباية الشاي بتاعته وشرب منها، ابتسم وهو بيهز راسه..
ـ جربت يا حسن، كانت تجربة هباب بعيد عنك، تصدق من وقتها ماروحتش اسكندرية، ولا حتى بفكر اروح.
رده صدمني واستغربت من كلامه، الراجل على قد ما كان بيبتسم وهو بيرد عليا، بس كان بيتكلم بثقة وكأن اسكندرية لو فكر يروحها، هتبقى رحلة مالهاش رجعة، وده خلاني سألته..
ـ للدرجة دي!.. انا مش همدح وعد مميزاتها، لاتقول عشان اسكندراني بحليها في عينك.
قاطعني في الكلام..
ـ الحكاية مش في جمال البلد ولا جوها، ما الكل عارف قد ايه هي حلوة، بس قفلتي منها ليها اصل واساس، لما تعرفه هتعذرني.
فضول العمال ومن قبلهم انا، خلت روسنا اتخشبت ناحية المهندس، حط واحد من العمال دور شاي جديد، ومن قبل ما اسأله سبب كلامه هو كمل..
ـ من كام سنة فاتوا، جه الصيف حر نار، لدرجة إن الناس حست إن بوابة من بوابات جهنم اتفتحت علينا، وقتها اللي ليه واللي مالهش في جو المصايف، ظبطله قرشين وسافروا للمدن الساحلية، اسكندرية وغيرها من البلاد التانية، انا كُنت من الضمن.. ده بعد زن مراتي وولادي انهم عاوزين يتفسحوا كام يوم في الإجازة، اتكلمت مع مراتي ونويت فعلا اننا نطلع مصيف، تاني يوم بعد كلامي معاها جيت المكتب كالعادة، بالصدفة كان موجود واحد من اصحابي الاسكندرانية، بعد ما خلص الشغل اللي كان مطلوب منه في المكتب، جه قعد معايا، بعد ما سلمنا واطمنا ع الحال والاحوال، قولتله..
ـ والله انت ابن حلال، لسه امبارح كُنت انا ومراتي جايبين سيرة اسكندرية.
ـ خير ان شاء الله.
ابتسمت وانا برد عليه..
ـ خير والله، خيرتها بين اكتر من بلد نصيف فيها كام يوم مع الولاد، ف اختارت اسكندرية.
ضحك وقال..
ـ والله ست بتفهم، ياابني هو في احلى منها مصيف، اتوكل على الله وجهز شنطك، ومكان اقامتكم عليا ماتعولش همه.
اتبسط جدا من التسهيلات اللي جتلي في لحظة، بس حبيت افهم يقصد ايه، سألته..
ـ مش فاهم، هتجبلي شقة يعني؟
ـ يا عم شريف عيب عليك، هجبلك شقة وشقة صاحبك موجودة!.. حدد انت اليوم وحط شنطك في عربيتك، اول ما توصل اسكندرية اتصل عليا، هجيلك المكان اللي انت فيه واجبلك معايا مفاتيح الشقة، وهي قريبة من البحر.. اقعد فيها براحتك طول فترة اجازتكم، يارب تقعدوا فيها شهر او حتى شهرين.
ضحكت وانا بقوله..
ـ حيلك حيلك، شهر وشهرين ايه بس، كلهم 15 يوم.. ده لو قدرت اكملهم وماحدش كلمني من المكتب عشان ارجع، مش عارف والله اشكرك ازاي يا سيد.
بص في ساعته، رد عليا وهو بيقوم من جنبي..
ـ بلاش شكرا والجو ده، مافيش بين الاصحاب شكر.. هسيبك انا دلوقتي عشان اتأخرت، على اتفاقنا.. بمجرد ما عربيتك تدخل اسكندرية اتصل عليا، هتلاقيني قصادك.
مشي صاحبي من المكتب، بعد خروجه.. خدت تليفوني من على مكتبي واتصلت على مراتي، حكيتلها الحوار اللي دار بيني وبينه، فرحت جدا وطلبت مني اخد اجازتي من الشغل، وفعلا ده اللي حصل، قدمت طلب اجازة 15 يوم، وبعد جدال مع مديري في الشغل بسبب طول الفترة وافق عليها، كانت بدايتها اخر الأسبوع، بدأت مراتي في تجهيزات حاجات المصيف والسفر، قبل السفر بيوم وهي بتقفل الشنطة بصتلي وقالت..
ـ مش هتتصل بصاحبك عشان تقوله اننا جايين بكرة؟
لما البني أدم مننا يحسم امره بدون ترتيب وتنظيم، يستاهل اللي يجراله.. وده طبعا اللي عملته******، رديت على مراتي بأجابة تلقائية، وكأنها إجابة بديهية مسلم بيها..
