” التعلم بالنمذجة ”
كتبت/ هند يعقوب
كتبت دكتور هند يعقوب استشارى الصحة النفسية والمعالج السلوكى
هل تعلم أن ابنك لا يتعلم الاحترام من كلامك بل من طريقتك
صدمة الوعي: الطفل مراية مش سبورة
بنفضل نقول لولادنا: “احترم الكبير” “متعليش صوتك” “استأذن قبل ما تدخل”.
ونتفاجئ إنه بيرد علينا بوقاحة، أو بيكسر كلامنا قدام الناس.
ليه؟ عشان الطفل لا يتعلم ما تقولين… الطفل يصبح ما يرى
علم النفس التربوي اسمه “التعلم بالنمذجة”. يعني مخ ابنك شغال 24 ساعة كاميرا بتصور تصرفاتك، مش ودانه اللي بتسمع كلامك.
_الدرس العملي من بيتك
لو عايزاه يحترمك احترميه انتي الأول قولي “لو سمحت” و “شكراً” وهو بيجيبلك حاجة ، خبطى قبل ماتدخلى علية غرفتة
ابنك اللي شافك بتصرخي عليه عمره ما هيتعلم يوطي صوته.
_ لو عايزاه صادق بطلي تكدبي قدامه “الكذب الأبيض”. متقوليش لباباه “قولي مش موجود” وهو واقف سامعك.
ابنك بيتعلم إن الكدب أداة نجاة، مش عيب.
_ لو عايزاه عنده حدود اتركي مسافة… فالماس لا يُلمس إلا بقفاز
لما تسمحي لحد يهينك قدامه وتسكتي، انتي كده بتعلميه درس واحد: “السكوت على الإهانة عادي”.
_ الحقيقة اللي بتوجع وتريح
ابنك مش هيفتكر المحاضرة اللي اديتهاله ساعة عن الاحترام.
ابنه هيفتكر اليوم اللي شافك فيه بتتعاملي بذوق مع سواق التاكسي، أو بتعتذري لباباه لما غلطتي، أو بتقولي “لا” باحترام لحد تعدى حدودك.
الاحترام مش درس… الاحترام عدوى.
والعدوى الوحيدة اللي بتنتقل من عينيكي لقلبه.
قبل ما تطلبي من ابنك “كن محترماً”… اسألي نفسك: “هل أنا نموذج الاحترام اللي عايزاه يشوفه؟”
ابنك مش مشروع تربيه بالكلام. ابنك انعكاس لطريقتك.
فربّي نفسك أولاً… هو هيتربى لوحده
#د_هند_يعقوب
