كتب محمد مصطفى
فى بداية الحوار بنرحب بالرسامة الموهبة المنفردة الاستاذة :مريم صابر محمد.
ممكن تعرفيني بيكي؟
مريم صابر محمد ٢١ سنه من محافظة القاهره في مدينة الشروق
اي نوع الفن الي بتقدميه؟
رسم وبشتغل تطريز بقالي سنتين.
كلميني عن موهبتك بالتفصيل وبداية ظهورها؟
انا رسمي موهبه من والدتي وانا صغيره كنت برسم كتير وهي شجعتني ودعمتني اني اطورها مع الوقت وكان مستوايا بيتحسن في كل مره برسم فيها . وبالنسبه لشغلي انا بحب التطريز اوي وكان نفسي يكون هو مجال شغلي ف جربت في يوم اني اشتغل رسمه هديه تكون مميزه لصديقه عزيزه عليا وعجبها اوي وعجبت اهلي وصحابي ودعموني اني اكمل واني هنجح فيه وبدأت وعملت جروب علي فيسبوك وجالي دعم من اللي حواليا كتير شجعني اكمل وبقيت برسم بالخيط وهو واخد كل وقتي وانا في العموم كنت مولودة بيها من صغري اكتشفوها لما كنت بقعد لواحدي وانا صغيرة وافضل ارسم ووالدتي شافت فيا الموهبة ونمتهالي.
هل دعمك حد في بداية مشوارك الفني؟
اهلي وصحابي في مشواري كله هما بيدعموني بس بالاخص في البداية الوالدة عشان هي كمان رسامة كبيرة في نظري بس لما كبرت بقيت بدعم نفسي وشايفه اني هقدر اعمل المستحيل في يوم من الايام.
طب اي هي طبيعة الدعم من ال بيحبوكي؟
لما برسم رسمه جديده او بشتغل طاره وبنزلها post بتبسط اوي بالكومنتات بتاعتهم وبيقولولي يافنانه علي طول ده بيحسسني اني عايزه ارسم واشتغل اكتر وخصوصا لما بلاقي تعبي بيتقدر وبلاقي اقبال علي شغلي وناس كتير بتحب اني ارسملها حجات او اعملها منديل لافراحها لكتب الكتاب دا بيسعدني اوي.
طب ناوية لما تتشهري باذن الله هتسمي البراند اي لاننا عرفنا انك طموحك يبقي ليكي براند تطريز مش كدا كلمينا عنه؟
هو انا بحب اسمي اوي ولما بدات شغل التطريز بتاعي سميت الجروب maryam gallery لاني من وانا صغيره بحلم افتح جاليري احط فيه كل شغلي تطريز الطارات او تطريز علي الهدوم والشنط وكل الفنون اللي بعملها هتبقي فيه وكمان هعلم الاطفال واساعدهم يتطوروا اسرع في موهبتهم وكمان نفسي شغلي يكبر في معارض ويلف العالم قربب.
طب ممكن اعرف طموحك الفترة الجاية هنشتغلي علي نفسك ازاي ؟
هرسم وهشتغل اكتر من الاول بافكار جديده وهعمل اعلانات عن شغلي عشان يكبر اكتر وهحاول ابدع في شغلي عشان كل مببدع في شغلي شغلي بيوصل اكتر للناس وهعمل حجات مختلفة قريب.
طب اي اول رسمة بداتيها في مسيرتك الحقيقية كانت بتعبر عن اي ؟
انا بحب الكرتون اوي وطول الوقت برسمه وحتى في شغل التطريز بدات برسمة وشوشني ودي كانت حاجه مختلفه وعجبت الناس لانها جديده مش تقليديه زي باقي رسومات التطريز.
طب والدك ووالدتك اتعاملو مع موضوع الرسم ازاي ؟
فالبدايه كانوا بيوفرولي الادوات اللي بحتاجها عشان ارسم وبيستنوا لما برسم رسمه جديده عشان يعرفوا مستوايا وصل ل ايه وكل ما كان بيزيد كانوا بيفرحوا اكتر وعلي طول يقولولي اني فنانة البيت .
طب قوليلي يامريم ازاي بتوفقي بين الرسم والدراسة وحياتك واي ال بيلهمك للرسم؟
وقت الدراسه بحاول مضغطش نفسي وبيكون تركيزي اكتر علي دراستي ولما بخلص الامتحانات برجع ارسم واشتغل تاني.
في النهاية طبعا انتي رسمك فوق الخيال بجد وحاجه جميلة جدا تحبي تشكري مين وتقولي اي للناس ال بتدعمك وقولي كلمة لنفسك.
عايزه اشكر اهلي وبالاخص والدتي علي انها دايما في ضهري بدعمها المستمر في كل حاجه ولصحابي وانهم بيشجعوني اكمل . وانا فخوره بنفسي للي وصلتله لحد دلوقتي وبقول لنفسي انا قدها ومفيش حاجة هتوقفني ابدا وناوية اني اطور من نفسي وبقول للنفسي انتي تستاهلي النجاح عشان عافرتي.
في النهاية بنشكرك يااستاذة مريم واستمتعنا بالحوار معاكي جدا ونتمني متكونش اخر مرة وبنتمنالك التوفيق ودايما في تقدم يارب.
