كتبت د.اميرة طيرة
العشق والحب للفن هو البوابة الرئيسية للنجاح بل ولأي شخص فكثير من الأشخاص نجحوا ووصلوا للعالمية لمجرد الإتقان والإيمان بحلمهم والسعي ورائه دون النظر إلي الصعوبات والظروف أو الضغوطات التي قد تمارس ضدهم وهو مافعلته الموهوبة البورسعيديه في مجال الرسم ذات السن الصغير وهو 16عشر عاماً .
زينب محمد ” ابنة محافظة بورسعيد التي أبهرت كل متواجدي رواد نادي ادب بورسعيد عند عرض ابداعتها الفنية الاكثر من رائعه من قبل رئيس نادي ادب بورسعيد الأسبق “اسامة عبد العزيز” ومازالت مستمرة حتي الآن بأعدداتهاو موهبتها الفنية
لذا كان لنا حوار صحفي بجريده أخبار الوطن العربي مع الرسامة زينب محمد
أهلا بيكي يا فنانه بجريدة أخبار الوطن العربي
أهلا وسهلا
موهبتك وبداية ظهورها ؟
انا بحب الرسم من وانا صغيرة بس بدأت تطور ايام الكورونا لأن كنت بقضي وقت طويل في الرسم
هل دعمك احد؟
اه طبعا عيلتي اول داعم ليا وصحباتي واساتذتي
كان في صعوبات واجهتك في بداية مشوارك الابداعي؟
اكيد في الاول خالص أنا مكنتش بعرف ارسم اي حاجة وقعدت مدة طويلة لغاية مابدأت اعرف ارسم
من وجهة نظرك الرسم هواية أم موهبة ؟
انا برأي الاتنين مهمين لان اللي عنده موهبة ومتقنها هتبقا بالنسباله هواية واللي عنده هواية هيطور فيها لغاية ماتبقى موهبة
مين أكثر الرسمين اللي تحبي إبداعاتهم الفنية وتأثرتي بفنهم ؟
الحقيقة أنا مليش فنان معين وبتفرج للفنانين كلهم بطرق رسمهم المختلفة
عندك أي مواهب أخري ؟
مش بالظبط بس بتعلم شغل الهاند ميد وهتعلم كتابة وإلقاء الشعر قريب إن شاءالله
إزاي بتوفقي بين حياتك وعملك وموهبتك الأبداعية؟
أنا مبرسمش غير لما اكون مخلصة كل اللي ورايا عشان مقصرش في جوانب حياتي التانية
ايه اللي ينتظره قريبا كل محبي زينب محمد ؟
إن شاء الله ناوية اتعلم أساليب جديدة من الرسم زي الرسم بالالوان الزيت والماية وانواع رسم مختلفة زي التشكيلية وماندالا
هل سبق وعرض لك اي رسومات في أي معارض أو أماكن مهتمة بمجال الرسم والرسمين ؟
لا لسه باذن الله
لكي اي القاب وما سر اختيارك له لو وجود اللقب؟
كل اللي يعرفوني بيحبوا ينادوني فنانة
ماذا كان رد فعل والديك عندما شاهدوا الرسومات الخاصة بك؟
بيبقى ردة فعلهم الدافع الكبير ليا على الاستمرارية
عندك بعضا ًمن الطقوس تظهر عند الرسم والإبداع؟
أهم حاجة يبقا المكان نضيف وشاي وتمام كده
سبق لكي ورسمت اي شخصيه مشهوره؟
ايوا الدكتور مجدي يعقوب
مين اكثر شخصيه خياليه تتمنيت رسمها؟
في شخصية اسمها ماليفيسينت ورسمتها
ما اللي بيجذبك أكثر لاظهار إبداعك الفني؟
بكون مستنية ردة فعل الناس وعيلتي عليها عشان بتبسطني اوي.
ايه هي طموحاتك المستقبلية اللي حابه تحقيقها في مشوارك الفني؟
اطور اكتر من رسمي والناس تعرف اني برسم واشارك في معارض .
كم يستغرق من الوقت لرسم لوحة فنية ؟
في المتوسط٣ او٤ ساعات عشان أدي الرسمه حقها
تحبي تقولي ايه في آخر الحوار لكل من يبدأ مشواره الإبداعي في أي مجال كان؟
خلي عندك ثقة في ربنا ثم نفسك انك تقدر تحقق اللي نفسك فيه سواء عاجلا أو آجلا يعني انا اخدت سنتين عقبال مارسمي بدء يتحسن فامتفقدش الامل من الاول واسعي وراه .
بشكرك زينب علي الحوار الرائع وبنتنمي لكي 
مستقبل مشرق ورائع في مجال الرسم والابداع.
واليكم جانب من ابداعات بنت الباسلة
