أحمد شاهين لجريدة أخبار الوطن ” الجمهور هو اللي بيقول مين يكمل ومين ميكملش لأننا بنمثل للجمهور “
حوار / ماري جرجس
أحمد شاهين فنان لامع متميز وله طريقه خاصه به تلفت الأنظار له ، حيث بدأ عن طريق الأعلانات ولم يكتفي فقط بظهوره علي الشاشه الصغيره بل هو أيضاً مميز بظهوره علي المسرح .
شارك في بعض الأعمال التي حققت نجاح كبير منهم مسلسل ” ب ١٠٠ وش ” ومن أكثرهم تميز مسلسل ” الكبير أوي ” ومن أحدث اعماله مسلسل ” صوت و صوره ” وغيرهم من الأعمال .
ظهورك كضيف شرف في مسلسل ” الكبير ” الجزء السابع لفت الأنظار لك بخفه دمك ، حدثنا عن الكواليس؟
كلمني استاذ احمد الجندي والكواليس كانت جميله معاه رغم ان دي مش اول مره شغل بينا ومع استاذ احمد مكي ، وردود الافعال كانت قويه جداً وأصريت أني اربطه بدكتور ربيع وكل ده كنا مرتبين ليه وده لفت نظر الجمهور وأن شاء لله يتكرر الشغل معاه .
فنان تود الوقوف أمامه ؟
أنا بحب اشتغل مع كل الناس بس لو زمان مثلا كان نفسي أقف قدام أستاذ “محمود عبد العزيز ” ، استاذ “احمد ذكي” أو أستاذ “نور الشريف” .
بعد النجاح الهائل في دورك لمسلسل ” صوت وصوره ” ، حدثنا عن دورك وهل كنت تتوقع هذا النجاح ؟
كان دور محامي والتيم كله كان علي قلب راجل واحد ، والكواليس كانت حلوه وكنا حابين اللي بنعمله علشان كده ده انعكس للكاميرا ولحد انهارده الناس بتوقفني علشان الدور ده ، وانا مبسوط بنجاح المسلسل والشغل مع عمرو وهبه وصدقي فخر والمخرج وشركه اروما خصوصًا انه كان في وقت صعب بسبب أحداث اخواتنا في فلسطين فالناس كانت بتخرج ف ان هي تتفرج من اللي هما فيه بأنهم يتفرجوا علينا .
فنان قدير تتمني أن تقوم بعمل سيرته الذاتيه ؟
صلاح جاهين لان كتير اوي قالولي ان في شبه منه ويكون ليا الشرف أني أعمل ده .
عمل لك قريب لقلبك ؟
مسلسل ” ب١٠٠ وش ” كان وشه حلو علي كل الكرو وعليا .
هل ستشارك في رمضان ٢٠٢٤ ؟
في كذا مشروع بس لسه ممضتش حاجه وأتمني أشارك في رمضان ٢٠٢٤ وان شاء لله يكون رمضان حلو علينا .
كيف تري عبارة ” الجمهور عايز كده ” وكيف تنتقي اختيار أدوارك؟
الجمهور هو اللي بيقول مين يكمل ومين ميكملش لأننا بنمثل للجمهور وعلشان الجمهور واللي بيخلينا نكمل الجمهور وأنا لما عملت أدوار مافيهاش هزار كان دايماً الجمهور يقولي بنحبك في أدوار الهزار وده رآيهم ، و رآي الجمهور رقم ” ١ ” . اما أدواري مبحبش أكرر حاجه عملتها او استسهل وبحب احترم الجمهور في ادواري و أسيب بصمه كويسه .
ما هي أكثر الأعمال التي كانت صعبه عليك في مشوارك المهني؟
كل عمل مش سهل لآني بكون خايف لحد مانعرض بس دايماً لازم نجتهد زي مسلسل ” صوت وصوره ” كان فيه أيام صعبه جداً ، تصوير ٢٣ ساعه منهم ١٨ ساعه من غير موبايلي ولا بتواصل مع حد.
في النهايه هل تود تقدمه كلمه شكر لشخص كان له أثر هام في مجالك ؟
أشكر أمي لانها الداعم الحقيقي ليا واللي بتسندني وبتشجعني و دايماً بتقولي كمل ، فأحب اقولها شكرًا وأشكر أي حد أمن بيا وسمعني و أداني فرصه وساعدني .
