كتبت اميرة طيرة
سلمي جمال
بنت عندها 20 سنة من محافظة قنا من مركز نجع حمادي بتدرس في كلية التجارة، عاشقة للرسم منذ الطفولة و طموحة جدا، وبتسعى دائما لتطوير موهبتها و الوصول إلي اعلي مستويات الرسم بها ومن هنا كان لنا حوار صحفي مع الرسامة ذات الطموح “سلمي جمال”
كلمني عن موهبتك وبداية ظهورها ؟
من سنتين عملت بيدج علي الانستجرام و ابتديت انزل رسوماتي و كانت بتعجب الناس جدا و إعجابهم و دعمهم ده كان بيشجعني اطور من نفسي اكتر لحد و ناس كتير كانت بتطلب مني إني ارسمها بس كنت لسه في دراسة و لما اخدت الاجازة ابتديت اشتغل علي نفسي إني ارسم اشخاص كويس لحد ما وصلت للمستوى اللي عايزه و سألت رسامين صحابي ادي اوردرات دلوقتي؟
شجعوني جدا أني أبدا و فنزلت استوري عندي إني هبدأ اعمل اوردرات و بالفعل الناس ابتدت تتفاعل و ترد و تعمل أوردر و الحمد لله عملت عدد حلو جدا لحد دلوقتي
هل واجهتك صعوبات في بداية مشوارك الابداعي؟
مفيش عائق بالنسبالي غير ممكن الدراسة هي اللي كانت بتعطلني شوية عن الرسم لان الرسم محتاج وقت.
هل دعمك احد؟
صحابي و الفلورز اللي على البيدج
هل لديك أي مواهب أخري؟
اه بعرف امثل و بحب التمثيل جدا جدا
السوشيال ميديا بوجهة نظرك كان لها دور فعال في إنجاح اعمالك الفنية؟
اه السوشيال ميديا كان ليها دور كبييير جدا جدا لأن انا الأول كنت فاكرة رسمي عادي جدا و يمكن تحت العادي و لكن لما نزلت الرسومات على البيدج الناس ابتدت تقول رأيها و انبهرت برسمي و شجعوني جدا إني مهملش المجال ده و اشتغل على نفسي اكتر و هبقي حاجة كبيرة ده غير ان الرسامين و الفنانين اللي عندي كانوا بيقولولي على الأخطاء اللي في رسمي و بالتالي كانوا يساعدوني اني احسن من نفسي و كان بيشجعوني دايما هم و الفلورز اللي عندي عموما و السوشيال ميديا خلتني اتعرف على رسامين كبار و اتعلم منهم و تشجيع الناس ليا على السوشيال ميديا كان كبير جدا و كان بيشجعني و بيبسطني و بيخليني اشتغل على نفسي اكتر و اكتر
لو طلب منك عمل رسمة غير لائقة لك رسمها أو تعبر برأي المجتمع خارجة ترسمينها ام لا ؟
انا ضد طبعا اي رسمة خارجة لان ده ضد دينا و مبادئنا
ما رايك بجريدة اخبار الوطن العربي ؟
جريدة كويسة جدا اول ما بعتلكم استجبتوا علطول و رديتوا عليا و كنتوا مرحبين جدا بيا
ماهي انجازتك الفنية ؟
اخدت شهادة تقدير من مدرستي الاعدادية و نزلي بوستين قبل كده في جروب توجيه التربية الفنية بمركز نجع حمادي و نزلي مقال على جريدة اليوم السابع و عملت حوار صحفي مع مجلة عالم النجوم و عملت لقاء مع قناة الصعيد
هل الرسم هواية أم موهبة؟
الاتنين في ناس بتبقي عندها الموهبة و فيه ناس بتاخده كهواية
رايك في الفن والأدب في هذه الفترة ؟
انا شايفة ان فيه تطور طبعا و شايفة الشباب مهتمين بمواهبهم و ده شفته بعيني
حدث لك قبل ذلك ما يسمي ببلوك الرسم وكيف تخلصتي منه ؟
اه بيحصل معايا اللي بعمله إني باخد بريك شوية من الرسم و ببتدي بعدين خطوة بخطوة و بالتدريج اني ارجع تاني و لو حتي برسومات بسيطة و بغير المكان اللي برسم فيه و في الغالب برسم بألوان علشان اخرج نفسي من المود ده و لان الألوان بتدي بهجة و انت بترسم و مريحة نفسيا.
هل لديك بعضا ًمن الطقوس تظهر عند الرسم والإبداع؟
انا بحب جدا اسلوبي في الرسم و اني بعمل لنفسي جو هادي مع الميوزك بتاعتي و اني ارسم براحة و بهدوء و بحب اكون دقيقة في رسمي جدا.
لو شخص من متابعينك قام بتعليق سلبي لك علي عمل من اعمالك ماهو رد فعلك وقتها؟
بفهمه ان كلامه ده ملوش لازمة لاني بحب الحاجة ده و عمري ما هحبط منها
ما الذي يجذبك لاظهار إبداعك الفني؟
العزلة بتكون في وقت الرسم بس علشان يتوفر الهدوء و الروقان و جو ملهم للرسم و الابداع و لكن غير وقت الرسم بنتعامل بشكل طبيعي جدا و بنختلط بالناس و بالحياه بشكل عام
تحبي تقولي ايه في آخر الحوار لكل من يبدأ مشواره الإبداعي في أي مجال كان؟
بالتدريب الكتير و انه يتفرج دايما علي فيديوهات علي اليوتيوب و يتعلم من الرسامين الكبار و يرسم كتير هيتعلم من أخطائه انك تشجعه دايما انه يبقى احسن و تصقفله على اي تتطور يمر بيه.
بشكرك أستاذة سلمي علي الحوار الممتع وإجابتك للأسئلة
انا كمان حبيت الاسئلة انها كانت مختلفة عن اي حوار تاني
شكرا جدا
