متابعة نشوى شطا
لو انت شخص مثالي أو مُنشد للكمال perfectionism أو تعرف حد عنده المشكلة دي فالمقال دا ليك
أولا يعني ايه شخص مُنشد للكمال، وليه دي مشكلة؟
يجيب دكتور عبدالله أحمد استشاري العلاقات الزوجية والأسرية المنشد للكمال هو شخص عنده معايير عالية جدا حاططها لنفسه في انجاز كل شئ في حياته تقريبا…. لما يجي يخلص أي مهمة عنده استعداد يقعد يشتغل فيها أيام وليالي في حين انها ممكن تخلص في ساعة واحدة، وكل ما يخلص يبدء يطلع نواقص دقيقة جدا ويعيد تاني أو يعدل تاني، وفي الاخر برضو مش بيكون مقتنع بااللي هو بيقدمه….
ويضيف دكتور عبدالله أحمد طبعا ده بيسببله حالة شديد جدا من الارهاق النفسي والذهني، وبيعيق تقدمه لإنه غير واثق في اللي بيقدمه وشايفه دائما دون المستوى، ومينفعش يطلع للنور وهو بهذا الشكل….. وقيس على ذلك الدراسة.. العمل…. العلاقات. اختيار الشريك، والتعامل معاه…الخ
وهنا يأتي السؤال المهم..هل هذه المشكلة كمان جذورها من الطفولة؟
يجيب استشاري العلاقات الزوجية والأسرية طبعااا… في نتائج بحث تم نشره مؤخرا بتقول ان في علاقة بين الشخصية الكمالية وصدمات الطفولة ، وان الشخصية دي بتتكون لما الوالدين بيحطوا توقعات عالية على الطفل، وبيطلبوا منه أنه يكون مثالي في كل شئ، وبيحسسوه أنه مش كويس بشكل كافي، دراسته مش قد كده… غرفته مش قد كده….. طريقته مش قد كده…. مش بيهتموا بهواياته… الخ
فبيفضل يحاول أنه يبذل مجهود أكبر علشان يواكب متطلباتهم، فبيكتسب طريقة التفكير دي وتبقى جزء منه وبتشكل شخصيته… بالإضافة إلى ان الشخص ده بيكون عرضة للاكتئاب لإنه دائما غير راضي عن نفسه وعن اللي بيقدمه.
فلو انت أب او أم رفقا بأبنائكم وكفاية أذى وكفاية ناس مشوة، مش لازم نشوف أولادنا مثاليين علشان نحلف للناس اننا أجمد أباء وأمهات وأولادنا ربنا مخلقش أحسن منهم.
ويختتم دكتور عبدالله أحمد حديثه قائلاً ولو انت اللي بتعاني من المثالية أو غيرها بسبب الأذى اللي اتعرضتله ف لسة عندك فرصة طالما لسة عايش انك تنقذ نفسك ومتنقلش نفس الكارما لأبنائك….
